احمد بن فهد
في سكة الاحباب ما شفت احباب
الكل بالدنيا لها في ظروفه
حتى عديل الروح فجأه كذا غاب
من دون لا يدّي تلامس كفوفه
رحل وانا اللي ما حسبتلّه إحساب
اني عجزت القى جواب لعزوفه
حاولت ادوّر له عذر بين الاسباب
وأزريت اأبيّن شي مخفي بجوفه
أستنكر افعاله ولي قلب منصاب
ويشفع له اللي كان لجلي وخوفه
يمكن لانه غاب والبعد غلاب
حاولت انسى رجعته قبل اعوفه
نويت انسى لكن القلب ما تاب
ما تاب لاني في منامي اشوفه
واصبحت امثل ضحكتي عند الاصحاب
وفي داخلي انسان فاقد هنوفه
حاولت اظهِر بسمتي عند الاغراب
واظهرتها و احزان صدري ضيوفه
ارسم ملامح وجهه بْوجه الاجناب
واتذكر الواقع واردد حسوفه
بدرٍ تناظره البشر شوق واعجاب
كساه ربي من محاسن وصوفه
انا انتظر نوره وللوصل طلاّب
مدري علامه ليه بين خسوفه
واكثر سؤالٍ داخلي كلّه اعتاب
وين الغلا والشوق وين المروفه ؟
قدّمت له احساس صادق وهو جاب
نفس الغياب اللي بصدري سيوفه