عبدالرحمن السعيد
عايش على قيد الشغف والاماني
وعيني على مشراف الأطلال تغفى
ياذكريات الأمس شوقي ضناني
أيام قلبي من خوافيك وجفى
من فلسفات الحب إنك تعاني
بس تبتسم للي رحل عنك واقفى
شفني معك واقف وشامخ كياني
وجروح قلبي مالقت فيك ملفى
رغم الألم اللي بسببك أحتواني
خذني زلالٍ يغدقك دوم وأصفى
ورغم إنكسار الدمع وسط المحاني
خذني شعور الحب في البرد وأدفى
هذا أنا قدمت صادق حناني
وإحساس عشق وموج شوقٍ ولطفا
وأصبحت لك نبراس دون إمتناني
وفرشت لك قلبي محبه وعطفا
وخليتني أذكر بقايا زماني
وأبيّح المكنون وما كان أخفى
وإن كان ماقدّرت حبي واماني
لاعد تجيني تالي الليل تكفى
بأصبر على شط الشغف والأماني
ومركب حياتي في مراسيك يغفى