احمد الخضيري
في سكة الاحباب ما شفت احباب
الكل بالدنيا لها في ظروفه
حتى عديل الروح فجأه كذا غاب
من دون لا يدي تلامس كفوفه
رحل وانا اللي ما حسبتلّه احساب
انه يغيب و لا يوضح عزوفه
حاولت ادوّر له عذر بين الاسباب
تعبت ابيّن شي يخفيه جوفه
استنكر افعاله وقلت الامل خاب
ويشفع له اللي كان لجلي وخوفه
يمكن لانه غاب والبعد غلاب
حاولت انسى رجعته قبل اعوفه
نويت انسى لكن الفكر ما تاب
ما تاب لني في منامي اشوفه
واصبحت امثل ضحكتي عند الاصحاب
وخلف الصدر انسان اعزز وقوفه
حاولت اظهِر بسمتي عند الاغراب
واظهرتها و احزان صدري ضيوفه
ارسم ملامح غايب بوجه الاجناب
واتذكر الواقع واردد حسوفه
بدر و تناظره البشر شوق واعجاب
كساه ربي من محاسن وصوفه
انا انتظر نوره وللوصل طلاّب
مدري علامه ليه بين خسوفه
واكثر سؤال آردده كنّه اعتاب
هل يجني الجاني ويده رؤوفه
قدّمت له احساس صادق وهو جاب
نفس الغياب اللي بصدري سيوفه