عبدالرحمن السعيد
تهلكني الغيره وانا ماأبيّن
وفي داخلي يكبر ويكبر مكانك
أصبر على مابي عساني أعيّن
موقف يساعدني واحرك حنانك
الشوق جاير ماهو ياقلب هيّن
كفاك رب البيت شرّه وأعانك
انا حنون وعاطفيٍّ وليّن
سقيت بدموعي دلع بيلسانك
في داخلي شيخٍ جليلٍ وديّن
ربّت على كتفي وكلّه عشانك
الموت قلبي عاشقٍ وحنيّن
عشت بزمن ياقلب ماهو زمانك
غرٍ لاهو دقيّق ولا هو سميّن
لكن هزّ أركان حضرة كيانك