ابمدح الطيّب ومن يفعل الطيب
ماهمني كثر الحكي والملامه
اي والله امدح حافظين المواجيب
اللي لهم في كل ماقف علامه
شرواك يابندر حصان الاطاليب
يامعتلي بالمجد ذروة سنامه
ياللي بضيفانك كثير التراحيب
تشهد على فعلك صحون الكرامة
دايم ومنزالك بروس المراقيب
ومجلسك مالم الردي والهلامه
مكارمك غيثٍ مزونه مناصيب
متصدرٍ بالمرجلة والزعامه
كنك تقول لعاكفين الاشانيب
اطلق شنب يقلط ويكرب حزامه
حرٍ مجرب مايبالك تجاريب
ولك هامةٍ تعلو على كل هامه
تاقف ليا منّه عوى الذيب للذيب
ومواقفك تبقى ليوم القيامة
يامعزب اللي مالقاله معازيب
يافزعة اللي جور الايام ضامه
لو الدهر شمس وعجاج وملاهيب
قابلتها يابو سعد بإبتسامه
دامك حزامي فالليال الشلاهيب
لا والله اببشر بطول السلامه