قلت بكتب قصيده وأتغنّا
يوم عيد السعوديه هديّه
فوق ست وثمانين وتثنّى
مملكتنا تفوق اجمل صبيّه
وأجتمعنا شمالٍ مع يمنّا
مشرق ومغرب ونجد العذيّه
نحتفل فيك ياحضنٍ حضنّا
واحتفالاتنا بك سرمديّه
مهبطٍ للوحي لا ياوطنّا
فيك رب الملا ارسل نبيّه
وحّدك ياوطن زبن المجنّا
في شموخ ومهابه ومقدريّه
لوما عبدالعزيز اللي تبنّا
وحدتك ياوطن رحنا ضحيّه
فضل من خالقٍ إنسٍ وجنّا
كل يومٍ ومجدك له بقيّه
هم توالوا يزفونك وحنّا
خلف أبنا الموحد يا أبيّه
ياسعودية التحنان منّا
الولا والغلا صبح وعشيّه
عيدي كل فردٍ ماتهنّا
غير في رفعتك عن كل سيّه
عيدي لك دماء الشعب حنّا
موتنا لجل شانك شاذليّه
يَخسى من هو نوى بك يوم ضنّا
ويِخسي لو غواه ابليس زيّه
دون أرضك مع الشهم المكنّى
بوفهد نحتمي أرضك بهيّه
فيك رعد المشاعر حب دنّا
وفيك روح المواطن دوم حيّه
يافريدة محاسن في زمنّا
عيدي في حمى رب البريّه
ما نلام إبغرامك لا فتنّا
ولا توفي خصالك الأبجديّه
قلت بكتب قصيده واتغنّا
يوم عيد السعوديه هديّه
كل بحرٍ بغى وصفك خذلنا
واعذري شاعرك والشاعريّه
رددي في ربوعك لحن فنّا
كل لحظه وعيدك شع ضيّه
واقبلي شعب لجلك ماتونّا
باع نفسه لجل تبقي أبيّه