خليتني مثل الندى فوق الاوراق
باقي إشتياق الليل في صفحة صباح
أشتاق لك والشوق ثاير بالأعماق
والحب مكسب قلب خالي ومرتاح
جيتك وطن يحوي الغلا بكل الافاق
وجيتك بحر والموج باقصاي مجتاح
اغرقت قلبك عشق وإحساس عشاق
وأغرقتني رقه وأماني وأفراح
بديت ليلي معك لي وقت الإشراق
والعطر من آهات أنفاسنا فاح
خلني بصدرك وشم يختال بأحداق
وخلني بعينك حلم يغتال الأتراح
حتى إذا دمع الجفا عقبنا راق
يبقى العشق مابيننا شي ماراح
يطيح من عيني طويلين الاعناق
إلا الوفي عايش بها العين ماطاح
وأنت الوفا يسكن خفوقك ومالاق
إلا عليك الحب والشوق ياصاح
يامن ملكت الحسن وامتعت الاذواق
واستعذبتك إنفوس وقلوب وأرواح
يامن رواني حب من نبع الاشواق
وإستوطن بذاتي عقب كان سواح
أنا أحبك وأنثرك فوق الاوراق
واستمتعك طول الليالي للإصباح