وعد الأولاد وأمهم برحلة ترفيهية في العطلة الأسبوعية ، جهزوا لوازم الخرجة من قبل الظهرية .
ركبوا السيارة وأنطلقوا بسرعة جنونية ، قطع إشارة،دق بواري من حاره لحاره، يسقُط على أي سيارة معدية ، مافي إحترام لطريق ولا للبشرية ،كل هادا علشان يلحق البقالة قبل آذان العصرية ، يدور مكان يوقف فيه مالقى إلا مكان خاص بذوي الإحتياجات الخاصة وقف ولا همه بكل عين عقوية، دخل الدكان يلملم بسكوت وحلاوة وشربيت وسمسمية، طيران على الحساب ، طنش الطابور ولا وقف في الدور،واللي عاجبه عاجبه واللي مايعجبه يستلبشه ببلية ، ركب السيارة وبكل شطارة وصل الحديقة اللي عليها العين والنية.
فرشوا الفرشة وحطوا شويات وشوية ،فصفص ولوز وقعقع وجوز وحلاوة لوزية وشاهي وقهوة وحلو بلدو ولينية ، والعشا رز وكم دجاجة مشوية ، وبعد الأكل والشرب ، جا وقت اللعب شوية ، الكبار لعبوا كيرم وكمكم والحاجات ديه ، أما الصغار قطفوا الورد وكسروا المراجيح ورموا النفايات هنا وهناك، وكأن هادي الأشياء مالها دية .
ولمن جا وقت الرجعة ، لموا الأشياء بسرعة من غير مايطالعوا وراهم شوية، سابوا الحديقة بحالة مزرية، لا ماكفاهم دا كله،من شباك السيارة علبة العصير على السيارات تطير ، لا همهم كبير ولاصغير .
بالله عليكم ، أعطوني عقلكم وفكروا شوية ، هادي رحلة طبيعية ولارحلة همجية؟
من وقت خرجوا العصرية لغاية مارجعوا قبل الفجرية ماخلوا خطأ ما عملوه بكل قصد ونية.
طيب ،ليه العدوانية على الطبيعة والبرية ، إنتوا خارجين في رحلة ترفيهية ولا رحلة تدميرية ؟!
خلوا بالكم ترا في بشر حولينكم عايشين معاكم ، منتو لوحدكم على هادي الأرضية ، والخدمات والمرافق العامة والشوارع ، ماعندكم لها صك ملكية ، هي حق عام لك وليا، فلا تتعدى عليها بالأذية وحافظ عليها، وأحترم النظام والبشرية ، مو علشان تنبسط ، تخرب على البقية ،يأخي أرحمنا شوية، وياليتك تراجع نفسك في تصرفاتك الامبالية قبل الطلعة الجية ، صبرنا عليك هادي المرة ،مانضمن ايش الوضع المرة الجية .
ولا أقولك نصيحة أخوية، لو ماتبغى تتغير للأحسن وحيفضل حالك زي ماهوا،أقعد في بيتك بدل الغلبة دية ، وأتعشا رز وملوخية ولا مغازلية وحلي بزبدية مهلبية ، وأحبس بفنجال شاهي بالمرامية ، وحط رأسك على المخدة ونام نومه هنية ، علشان تلحق على صلاة الجماعة في المسجد بدري في الفجرية ، وربنا الهادي لك وليا.