عبدالرحمن السعيد
أبشرك ماعاد باقي تصاوير
حذفتها من ذاكرة ذكرياتي
الحين أبي ارتاح واعيش في خير
واستمتع بوقتٍ بقى من حياتي
استاهل الراحه وحلو التباشير
من عقب ما يبست معاكِ لهاتي
مرّه حلمت ان العشق بيننا كبير
أضغاث أحلامٍ تداهم سباتي
ماجا على بالي يجي منك تقصير
واشلون صرتي حربةٍ في قفاتي
تصدقي مايوصفك أي تعبير
إلا مسمى ( محطمة أمنياتي )
إلا على طاري فراق الغنادير
الصبر فيني من محاسن صفاتي
ماعاد تعنيني كبار المعاذير
مادمت عايش باحترامي لذاتي