بقلم الشاعر :محمد فريح العنزي
الصبر طيّب واليالي لها دور
لابد عقب الضيق تفرج إكربها
تظهر لك الايام مكان مستور
وتشوف معدنها وتعرف ذهبها
ولاكل من يضحك بها اليوم مسرور
يضحك وقلبه محترق من لهبها
ومني نصيحه لكل طيّب ومسطور
نصيحةً عند الولي نــحـتـسـبها
ادمح زلة صاحبك وأنت ماجور
زله لسان وكلمةٍ مــا حـسـبها
والعرف وهبه وكلمة الحق به نور
والطايله من حض منه كسبها
احدٍ غني وأحدٍ بالأحوال ميسور
وأحدٍ لذيذ النوم عينه حربــها
وأحدٍ يشد الحظ و الحظ معثور
ايديه تصفق رزقته ما شربهـا
وإن كان تذكر ماضي الوقت وعصور
ايام تمشي واليالي انحــسبـها
دارت بنا الايام والعمر بحدور
ولا أحداً قنع بالي قطف من عنبها
اللي بقى واللي رحل داخل إقبــور
كلٍٍ يحاسب في علومٍ جلـبـهــا
