فتحي السيد
كورة لابوها كورة
مسيكم بالخير يالربع
المفروض كان ينزل هالمقال يوم الاحد مثل العادة لكن مامن شيء صار يتساهل الكتابة ما غير مدير مدرسة تبوك والكثير اشبعوه سوالف ومقالات .
لكن في سالفة متجنب اني اكتب فيه واضطريت اسولف لكم عنها وهي الكورة اللستك الجلد ابو هوا الخميس الجاي الملك سلمان الله يحفظه بيرعى نهائي كاس الملك بين الأهلي والهلال، نهائي كبير بين كبيرين ملكيين والي يفوز مبروك عليه الكاس .
لكن الي اللي يقالهم اعلاميين رياضين ماش ما ودهم سالفة ننتظر النهائي ونبارك للفايز هذي مو بقاموسهم ( من الفريقين ) وكل كلامي على اعلامي الفرق كلها الهلالي والي يسانده من الاندية الثانية والاهلاوي والي يدعمه من الاندية الثانية يعني الاتحادي والنصراوي والشبابي والباقين كلهم اطيب معظمهم .
الي الطيب فيهم كنه يقول مباراة مهمه وتشريف ان فاز فريقي نبارك له وان فاز الاخر ( يخسى ويعقب ما يفوز ) وبعضهم دخل من هلحين بالذمم وحلل المباراة كنها شافها امس وشاف الظلم وصار من هلحين يتحلطم على ظلم فريقة والتحكيم يا الطيب والله المباراة باقي ما لعبت اصلا يا اخوي اصحى من النوم والخبال الي انت فيه تراها كوورة .
والثالث هذا مسيكين له اسبوع ما نام شغال بتويتر وسناب وجرايد وتلفزيون وعلى كل الخطوط 24 / 7 ساعة بث ما يمديه يرتاح شغلته بالحياة سلخ وجلد بالفريق الثاني وكل من يتشدد له وشوي بيطق به عرق من زود العصبية والحماس والانفاعالات الكذابة ولو جاه تهويش بالشارع هج .
وشطح واحد شبه منع ولي العهد حفظه الله لنشيد نادي بالملعب بالشياطين يا كبرها عند ربي هذا مهبول مو بصاحي هذا ودك يعلق مع رجوله وفلكه مثل حقت اول الليين يعض الارض المشكلة ان هالتجارة صارت رابحه وتجيب مشاهدات ودعم الجمهور اللي اكثرة مراهقين، تسب اكثر متابعينك يزيدون تفضح الفريق الثاني انت القوي اللي بيتابعك ملايين هذي السالفة بس لكن لو تسأله انت عمرك تبرعت لناديك بيقولك لا .
النوع الاخير المنتفعين يتبع شخصية معروفة لهذا النادي اوذاك ويمجده ويمدحه ويطلع به السما من زود المديح عشان اخر الشهر ياخذ المقسوم واي احد ينتقد معزبه يا ويله وياسواد ليلة يحاربه ويتصيد له
ما كأننا مسلمين واخوان وكأن هالكورة هي الحياة وهي المعيار الوحيد للحكم والتصرف مع الاخرين كل هذا ووزارة الاعلام نايمة بالعسل الوزير الاول الله يصلحه انشغل بقصايد في اليابان وغيرها .
عشان كذا اطلب من هالوزير الجديد انه يتحرك ويوقف هالي لعبو في الرياضة لعب وسوو تفرقات بين الاخوان والاصحاب لازم يكون الحل رادع ما هي بس سواليف وقف هالنوعية عند حدها.
سالفة انك تنتظر الين يصير شكوى ضد هذا او ذاك ثم تروح معاملة وتجي معاملة هذي ما حلت المشكلة واللي يقول هالنوعية لو ما حصلت ناس تدعمهم ما صارو كذا نقولة معليش اكثر الجمهور شباب مراهق يركبو الموجه وما تلومهم الناس بطبعها تحب الاثارة والاكشن وبدل ما تلوم الملايين من جمهور الكورة لوم الكم واحد الي مسوين كل هالتعصب والمشاكل بين الناس، لازم تتدخل وزارة الاعلام .
شرطة الرياض مسهم تصريح من ناد واحد ردوا علية ببيان لجم هالنادي والي يتشدد له .
اما هيئة الرياضة ريحت راسها من يوم جا ريسها الجديد قال انا مالي بكم وسحب الهيئة من الكورة .
الاتحاد السعودي ما قدر يدبر نفسة مع مشاكلة العادية فاكيد مراح يقدر على الاعلامين الي نقصد يعني ما بقي الا وزارة الاعلام عليكم حمل وامانة انكم توقفو كل المتطاوليين والمخربين الي يثيروا الفتن بالرياضة عند حدهم .
نهائي يتوجه الملك يعني المفروض يكون عرس لكل الرياضين ويكون فرحه شباب وجمهور الكورة يتحول الى حرب ومهاترات اعلامية وتجريح وتطاول هذي المصية ولابوها كورة الي تفرق بين الاخ واخوه .
والسلام ختام .
