د.عبدالرحمن السعيد
ماتدري ان الشوق فاضح وقتال
يعني بعيد وترتكب بي جريمه
ماتدري إنك نهر والعشق شلال
وإحساسك المرهف على القلب ديمه
فيها مطر ينبت به آمال وآمال
وفيها فرح يروي نفوسٍ يتيمه
والله ثم والله إن البُعد طال
والصبر ماعد له قلوب ٍحليمه
أستعذب الهمسات وأنشدك موال
وتضوي وسط روحي كهوفٍ عتيمه
أستعتمت من غيبتك وأنبرى الحال
وإتجمعت كل الجروح السقيمه
وإتجمرت كل المعاليق والبال
سطّر معاناتك بذكرى أليمه
في البحر شالوا قصتي معك يامال
وفي البر شافوني معالم قديمه
فيها من آثار الغلا مثل زلزال
وفيها منارات العشق مستديمه
وبأعلى صروح الحب سويت تمثال
من أصدق إحساسي معك ياعظيمه
لكن ذبحني البعد والشوق قتال
أثر البُعد أبشع وأقسى جريمه
