دخيل الله الحسيني
هبّت هبايب وأقلعت بعض الأشجار
وأنا سقيت أشجارها من يديّه
عواصفٍ لا هي بغيمه ولا أمطار
عواصفٍ هلت علينا أبرديّه
الشجرة اللي مالها طلع وأثمار
هذي من الأشجار شجره رديّه
ابعد عن السرحه ولو ظلها حار
ترا تحتها داب ولا حديّه
خلك بظل النخله اللي لها بار
مدّاتها تشبه لكفٍ نديّه
منوّل في ظلها الإبن والجار
واليوم جار الجار من سوء نيّه
هذا الزمن دوّار والوقت غدّار
تمدّ حسناتك وتجزى بسيّه
ندمح خطى المخطي ونبحث للأعذار
ونغض طرف العين لجل الحميّه
ونسكّر الآذان عن دقّت الطار
من شان بعض احوالنا الداخليّه
حنا عرب والدم في عروقنا حار
الذل مانرضاه والعنجهيّة
نرفض خطأ المخطي ولو صار ما صار
دون الخطأ نارد حياض المنيّه
حكامنا آل سعود من نسل الأحرار
ضرباتهم ضد المعادي قويّه
دون الوطن درعٍ ولشعب مدرار
للضد شمس وللموالين فيّه
واليوم بان الشر من كل الاقطار
الله عساها مدة دون جيّه
والخاتمه يا الله عسى الشر معثار
والخير مقدامٍ سريّه سريّه
