رجعان بن سالم العوفي الحربي
ياراكب اللي لاتساوى مع القار
معقب البنيان وآخر عماره
ليامشى ماتسبقه غير الأقدار
تقول نجمٍ منحرف عن مداره
شمال وجهه وآخذ قليلٍ إيسار
شمال عدل سد ركن الغماره
وخويي اللي ماتشبث بالأعذار
يدفع على فرقا المدينه بشاره
نبي مكانٍ ماتغطيه الاقمار
والهاتف الجوال مابه إشاره
في ديرةٍ مادوجت عقب الأمطار
فيها الزواحف ماتعرف الجحاره
وغير القمر بالليل ماتشوف الأنوار
أبعدت عن جو الترف والحضاره
نجلس على البطحا ونطبخ على النار
ونوقد بسمرٍ والمراكي زباره
والجو هادي لاعواصف ولا غبار
تعيشبه لحضه تعرف الإثاره
والصبح لاشفت الندى فوق الأزهار
حسبت وقتٍ فات كله خساره
وليا تقسّمنا المراكز والادوار
كلاٍ على خوياه يبي الصداره
بالأرض قصاص وبالضلع سبار
كلاٍ بحسب رغبته وأختياره
وليا سمعنا سلاح خوينا ثار
نعرف هدفه لاسمعنا مثاره
وليا تباين قال شبولي النار
وسوولنا دله وزيدوا بهاره
وقلنا العلوم وقال ياكثر الاخبار
وبدا بعلمٍ كلنا بنتظاره
الصيد شفته غافل كبار وصغار
وجبت الغزيز اللي عريضٍ فقاره