يامعجزه
للشاعر / عبدالرحمن السعيد ( الجريح )
يامعجزه هزت قلوب المحبين
غيرك يجي ويروح محدٍ درابه
هزيت عرش الشوق في داخل العين
وهزيت جذع الحب في وسط غابه
وأتساقطت اشواق قلبي ملايين
على خفوقٍ زاده الحب هابه
نسّيتني سنين العنا وسيرة الشين
وخليتني بالحب مغرم صبابه
تفسير معنى قول سيد المزايين
وشعور غارق في معاني الكتابه
إذا ذكرت اسمك وناديت (…….)
تستبشر الأحرف وتلقى الاجابه
الكون قسوه إانتي العطف واللين
والشوق نقمه وإنتي رحمة عذابه
دورت قبلك سيرة الحب من وين
من وين ماوجهت ألقى سرابه
شفتك وحبك صار وسط الشرايين
من دون أذن ودون أحسب حسابه
علمتني معنى الوله بين قلبين
وعيشتني بقصر الامل والرحابه
وعلمتني التضحيه بين شخصين
وأشلون عين الحب تشبه سحابه
(أثر الغلا مايذبح الناس ياحسين)
هذا انا اغليه فوق القرابه
بالعكس زاد الحب مابيننا البين
ياجهد نفسي كوب صافي شرابه
عشق أنسجن في داخلي مدة إسنين
والخوف كان من الغدر والذيابه
أطلق سراح العشق فك الجناحين
دامه معك مايفتقد في غيابه
لانك بعيني معجزه للمحبين
ولانك بقلبي حب محدٍ درابه