عبدالرحمن السعيد
الجو ذكرني بملامح صباحه
وصوت البحر كنّه من الشوق يدعيه
الموج هادي يشبهه في إرتياحه
ونسمة عشق مرّت عليّه تناديه
يانورس الأحباب جب لي وشاحه
بابروزه في داخلي واندفن فيه
البحر قلبه وفي هدوئه سماحه
وفي جلسة العشاق ماغاب طاريه
أشب شوقي وأرتوي من قراحه
وبين الحنايا نبض قلبي يناجيه
تتعبني الدنيا وترسله راحه
وتقرّبه عينٍ كستها المشاريه
فرحة صدر وبسمته وانشراحه
ودمعة فرح تسقي الحنين وروابيه
ياحادي العشاق تبغى الصراحه
أحس به فيني وكنّي حواليه
غيثٍ ويروي الجدب وتصير واحه
وتلقى ورود العشق تحضن مساقيه
الغيم والأجواء تشبه صباحه
والبحر وأصوات النوارس تناديه