سر ياقلم خذ من دمي حبر واكتب
ما عاد فيني صبر واتعبني الصمت
بعض المشاعر داخل الصدر تتعب
من ذكريات ما تلاشت مع الوقت
ماهمني لوم العواذل على الحب
مايوم في درب الهوى قد تندمت
الحب للأرواح كالغيث يسكب
احلى المشاعر بالأحاسيس تنبت
ذاك الذي ان جيت هلّا ورحب
مثل الغيوم اللي من المزن هلت
يروي ضما روحي بعد حالها جدب
وازهر غلا بالقلب دايم مع الوقت
انفاسها كالطيب وفراقها صعب
وانشهد اني ياعرب حبها ادمنت
الشهد يسكب من احاديثها سكب
والنظره لوماشي اقف ماتحركت
وتهز غصن البان لا لبست الكعب
أغصان من عذب السواقي تروت
لا مالت الخصله مع الريح لاهب
الخد منها قال ويلي تجرحت
أنعم من القطنه وألين وأرطب
حطه على الأوجاع ما كنها جت
ان جيتها ضايق عنا الوقت يهرب
وان جيتها مرتاح افراحي زادت
وليا غمز كالنمل في جلدي يدب
خارت عزومي في مكاني تسمرت
مضمون ماخلى بشر غيري يقرب
قلبي لها والعقل والروح سلمت
لعيونها ماهمني اركب الصعب
كله بسبة من بقربه تولعت
الشاعر/ محمد خبراني
