عبدالرحمن السعيد
باسافر في بحر عينك ولا ألقى بها مرسى
أتوه إبها وأفقد من حلاها إتجاهاتي
أعيش بعالمك واستبشر المستقبل وأنسى
سواليف الزمان العاتيه وأطمن آهاتي
أحبك فوضوية عاشقٍ بحروفه الخرسى
تتمتم في محيّا كبريائك طول أوقاتي
كثر مامرني طيف التخاذل والظروف أقسى
كثر مااشفق على شوفك واضحي لك براحاتي
يذكرني صبر قلبي عليك بقصة الخنسا
رباطة جأشها قدام عيني بكل وقفاتي
لك الله مابقى بذرة هيامٍ ماهي بغرسى
وسط قلب الحنين ولاشطت تحكي حكاياتي
حكاية عاشقٍ أصبح مع طيفك إلين أمسى
يداريكِ بظلّه من هجير الشوق ويحاتي
عروقه لولا ماطاري غرامك شفتها يبسى
مثل جدبا الأراضي والليال السود وسكاتي
مشاعر خافقه في حضرتك من غيبتك وجسى
يردد بينه وبينه دخيلك لمّي إشتاتي
دخيل الورد بخدودك دخيل إعيونك النعسى
ترسّيني على برّك وتستمتع ملذاتي
احبك عشتها لك والكبود بحبنا حمسى
احبك لين تسمع سيرتي من ضمن الامواتي
أحبك والنوايا صافيه ماناشها دنسى
أحبك والقلوب البيض ترسل لك تحياتي
باسافر بك ولا ودي ألاقي بخافقك مرسى
بأتوه بداخلك وأتنفّسك وتعيش قي ذاتي
