عبدالرحمن السعيد
بين الظلام وبين شعشاعة النور
وعقب السهر مع طيف غالي وغايب
وسيجارة الأشواق من بيننا تدور
وبأنفاسها ذكرى لكل الحبايب
أضحك كأني ممتلي فرح وسرور
وأبكي كأني حَبر ناسك وتايب
عايش تناقض وقت وإحساس وشعور
حتى الألم ماهو عن الذنب تايب
الحب مثل الدِين مافيه مجبور
من دون لاإكراه ولا غصايب
الحلم للنيّام أحيان مبتور
وأحيان يصبح حلم واقع وصايب
وأنا حلمتك يابعد أجمل الحور
حلمٍ يبادلني نسيم الهبايب
الله يجيرك من عنا الشوق والجور
يامن غلاها بين صلب وترايب
انتٍ تمرجحتي على القلب بغرور
لين الحنايا العوج صارت نصايب
عشت بظلام الليل يامنبع النور
وعاش السهر فيني مع طيف غايب