العذر منكم ياعرب والسموحه
أبنفجر والغيض في النفس مدفون
وين العروبه والنفوس الجموحه
الشام تُقهر والعذارى يصيحون
والشيب يبكى والايادي شحوحه
أطفال يُتم والشبابٍ بيموتون
من دون حلق العرض إيدٍ نطوحه
ودمٍ هُدر وأنفس تلبي ويضحون
ياللي رفعتوا الموت لاعلى طموحه
أحرار جيشٍ تاج عزٍ تعيشون
يامرحبا بالموت ياطيب فوحه
لاصار لأجل الله ياللي تخافون
المرجله في راس رجلٍ وروحه
ماهيب مانشيتات تُكتب وتقرون
ولاهيب من كسب الأيادي المدوحه
ولاهيب سلعة بيع ياللي تنادون
ياشامنا باقي عربنا مزوحه
إهمومها تصويت للي يفوزون
محبوبهم وإستارهم وسط لوحه
وبغداد وسوريّا وفلسطين للهون
والمنتخب عسكر بظبيٍ ودوحه
والكل غنى وأزعج الصوت بلحون
باقي أمل الشام مازاد نوحه!!!
وبشار عايش والعساكر يدقون
تستعجلوا معقول ؟؟ شوفوا شروحه
ممكن معاهم حق باللي يسون!!!
واللي يغطي الصبح حزة وضوحه
واللي حمانا والخلايق ينامون
إن القدر داير على كل دوحه
والحامي الله معطي الصبر والعون
يارازق العصفور في كل روحه
أنصر عبادك وإجعل العرض مصيون
يارب ضمّد شامنا من جروحه
وإحفظ ثكالى من قبل مايضيعون
الله ينصركم ويكتب فتوحه
ويذل بشارٍ ويلعنه مليون
عذراً بلاد الشام منك السموحه
مانملك إلا دعوه ودمعة إعيون