عايش الحرقان الحارثي  

اشوف باب العنا مصكوك وافكه
واقول يا ليتني ما كان فكيته

من اول السمن ما يطلع من العكه
واليوم لامن طلع نقول يا ليته

والجرح ما يطيب لامن الظفر حكه
ويطيب لن كان داريته وداويته

والراي لا صار ذرب وراح لا تعكه
لو يلتوي قالوا العربان لويته

والحر تلقى التصرف فيه والحنكه
ويعجبك باسلوبه الطيب ليا جيته

واليا زبنته وجيته وانت في ضنكه
تهون كربتك لا منك تناصيته

ويقف معك ماش لا ضنه ولا شكه
ولا يندرق عنك لن جيته وناديته

والصاحب اللي معك بالصدق لا تفكه
محدٍ يسد بمكانه لو فكيته

واما الردي لا ترجى خير من بنكه
ما هو بواقف معك مهما ترجيته

وان شفت ناسٍ تطبله على الدبكه
كبه ما يصحى معك لو كان صحيته

خله يذوق الغبن ويجرب الربكه
ويندم لا شافك مع اسرع خط مريته

وفي المجلس اقلط ولا تقعد على الدكه
ولا كل واحد لزوم اتجيه في بيته

كم صقر لاشاف صيد يطيح في شبكه
وياقع على الارض والعدوان شاويته

ووصيك لا تعترض للناس في السكه
وتندم ندامه على كل شي سويته

واحفظ فروضك ومالك لا اكتمل زكه
المال فيه بركه لن كان زكيته

واللي في شغله ملم ويعرف يحبكه
يحسب ظروف الزمن ويرف توقيته

والمسلم اللي يصلي قبلته مكه
وانا احمد الله ليا جاء الفرض صليته