ان كنت صاحي جعل وقتك تباشير
وان كنت نايم جعل نومك عوافي
يافرحة أحلام المسا يامسا الخير
يابحر عشقٍ في عيون القوافي
يامنيتي ياروح قلب العصافير
أنتي كريمة وصل وأنا سنافي
ليت الأمل يجمعني واياك ونصير
اجمل غلا ويزخرفه شهد صافي
أنتي مثل بسمة عشق حزة اعصير
مابين قلب وقلب ياريق شافي
سبحان من سواك وأحسن بتصوير
كل الحلا واللي عظم فيك خافي
يعيش طعم الغنج بين الغنادير
وتعيش ياعمر الدلع في ضفافي
ياحشمة المحرم على كل تقدير
وياعزة الشِيخه على كل هافي
انتي قراح الما وانا ضمة البير
وانتي القمر لاقالوا النور طافي
وانتي طريق العشق في زحمة السير
وانتي شعور الشوق في قلب لافي
وانا وقلبي والزمن والمقادير
جينا نرحب بك والاحساس طافي
جعلك ذخر للحب من دون تقصير
وجعلي فدا عشقٍ جنونٍ خرافي
ان كنت صاحي جعل تصبح على خير
وان كنت نايم جعل نومك عوافي