في أفضل الايام في شهر رمضان
ليلة غدر فيها سمعنا الفجيعه
إخوان باعوا العقل لأفكار شيطان
من برهم له مد إيد الخديعه
مدوا يدين الغدر لإثنين شيبان
أمٍ توفت والجريمه شنيعه
واما الأبو والأخ تحت لطف رحمن
وسط العنايه والحكايه فظيعه
خالد وصالح ياشبابيك الاحزان
يامن ذبحتوها لسدّ الذريعه
سلمتوا الخنّاس مفتاح الأذهان
وسوس لكم واستحسن إلكم صنيعه
أمك وأمك ثم أمك ولو كان
ماهيب من دينك ونفس الشريعه
ياخاينٍ مافيه دينٍ من أديان
يأمر بذبح أمه ولا بالقطيعه
طعنت من حملت بكم رغم الأوهان
وماتت وسط دمها بصوره مُريعه
حتى حنان الأب وإحساس الأخوان
بقلوبكم ميّت بحزة ربيعه
يارب تحفطنا على مرّ الازمان
نستودعك دين وبلدنا وديعه
المملكه فيها رجاجيل شجعان
يحمون هاذي الأرض سنّه وشيعه
ياالداعشي إسمع وأنصت بإذعان
نبيع دمنا والوطن مانبيعه
حنّا يمين الحزم في عهد سلمان
حنّا وطن واحد ونزرع ربيعه
نعيش به ونموت له عز الأوطان
الموت يدعينا وحنّا نطيعه
