ياما حلفت أيمان.. واعطيتني وعود
تكون خلٍ ما ابتعد عن خليله
أتاري دربك ضيق.. وآخره مسدود
دربك عسير وعودتك مستحيلة
كنت اتخيل درب مفروش بورود
واحسّ به جنات.. حوله.. خميلة
ضاع الامل في لوم وعتاب وصدود
وصارت حروف الشوق هزله وذليله
الحب مدري ليه محتار.. ياسعود
اقفى وقفّى باليالي الجميلة
ليه الغلا ما بيننا صار مفقود
والشوق يغفى والحشا يرتكيله
شف نبرتك واشلون صارت لنا عود
يشعل حنايانا بكلمه عليله
عرق الغلا من بعد ماكان مفرود
فيه اتمشى بالليالي الطويله
بعت الغلا من دون ناقد ومنقود
ثم قلت لي الدرب خضرا وسهيله
ما اقولها الله معك انت مطرود
الباب مقفل والاماني قليلة
شفني على باب الرجا ودي اعود
آمر تدلل جيت لك.. لو قتيله