أنقفل باب الهوى بقفلٍ وضبّه
وراح مفتاحه بركب الغايبين
مابقى في مجلس العشاق شبّه
والبواقي كلها شوق الحزين
يازهابه خبره إني أحبّه
من رحل عني وأنا أتنفس أنين
في دلالي أحمسه عشقٍ وأصبه
في سواليف الغلا للعاشقين
غاب عني ياعرب من دون سبه
ياعسى عذره عن إغيابه سمين
البحر ماهو بحر من دون غبّه
والعشق ماهو عشق لولا الحنين
ياوجع قلبي خذ إحساسي وخبّه
في حنايا كبريائي والسنين
شاحبٍ وجه الفرح من زود حبه
وأبتسم لالاح طاري الغايبين