عبدالرحمن السعيد
فمان الله سافر للفراق بمركب الاحزان
وأمتعتك جروحي ونزف قلبي وحبر اهاتي
فمان إجروح قلب ودمعة إعيونٍ على ماكان
فمان الماضي المطعون واللوعه ودمعاتي
فمان الجرح ياجرح السنين بساير الأزمان
فمان الحلم اللي صار كابوسٍ لأوقاتي
وأنا باعايشك ذكري أليمه في عيون أشجان
أجمّعلك شتات إسنين عمري من محطاتي
نثرتك حسن في وجه الجمال الطاغي الفتان
ولملمتك بقايا حزن جاير من زمن عاتي
تلعثم صمت قلبي بالحكي ياحيرة الوجدان
وباقي قصة إحروف الوله تحكي معاناتي
أجيلك من قواصي غربتي أدوّرك اوطان
والآقي في الوطن غربه تبعثر فرحة أصواتي
تخيلني حلم عاشق ومغرم هايم وشفقان
وفجأه أنتهى حلمه بقولة حبنّا ماتي
كذا حال الجريح اللي يموت وجرحكم مابان
أخفّي كل جرح وماتشوف إلا إبتساماتي
تذكرني أمل يكسي شموخك ياغصين البان
وتمنّاني عشق يرويك واتقبّل تحياتي
فمان الله سافر للفراق وخل لي الأحزان
وعيش أجمل حياتك ياجروحي بطعم اهاتي