آسف حبيبي ماقصدت إحراجك
أنا كذا ماكل شيء يعجبني
لاتضيع في بحر الظنون أمواجك
وتقعد على شاني تهد وتبني
روّح فمان الله ماعاد أحتاجك
لا تتعب إعيونك ولا تتعبني
خذ مابقى مني وعود أدراجك
وعلى رماد الذكريات أسكبني
بكره إذا مرّ العمر باوداجك
حاول من اقصى الذاكره تشطبني
لاشعلت في ليل الغرام سراجك
وقام الحنين بداخلك يطلبني
لا تقعد اتدوّر علي بادراجك
وعلى قصاصات الورق تكتبني
وان ضاق صدرك مالقيت علاجك
سو أي شيء الا انك تعاتبني
سولف لهم عني وفل حجاجك
واجمع حكيهم عنّي ورتبني
حتى قصيدي مثّله باخراجك
وغنه لو انك تكسره واطربني
هيا امسح ادموعك وعدل تاجك
ولوح بكفك بس لا تقضبني
سجين حبك واكرمه بافراجك
انا ضميري قاعد يعذبني
لغز وعجزت اقدر على استنتاجك
لو قلت احبك تقدر تكذبني !
(مهرة غرام ) احلامي من انتاجك
اتجاذب العشاق وتجاذبني
وانا اوعدك لامشي على منهاجك
واكسر عيون الشوق ماتغلبني
رغم اني احياناً سبب في ازعاجك
لا تعتبرني غير ذنب وتُبني