حصة اضافية يا شباب
سألتنا حنا يا اولياء امور الطلاب اذا يناسبنا ؟
لا
درست الموضوع من كل جهاته ؟
لا
سألت اي احد مضبط دوامه وساعة راحته ورخصته على وقت خروج العيال من المدارس وايدك ؟
اكيد لا
طيب يا اخوي ليش تزيد هالحصة وتلخبطنا الله يصلحك يعني لازم الفرحة ما تتم

قلناها يارجال من اول ما فيك حيلة انت وزير مختلف
لكن انت الوزير وكل وزير له وقته وانجازه.

لكن تكفى يا معالي الوزير عجل حقين المشاريع والله ياكثر المدارس المتعثرة والله حرام بعضها باقي على اثاث ولا رصيف خارجي واذا ماعلموك شف تقاطع الملك عبدالعزيز مع الملك سلمان مدرسة من سنتين باقيلها بس رصيف وشوية اشياء بسيطة نتحسر على هالمجمع الي ماله فايدة وغيرها كثير بكل احياء العاصمة هذا غير المناطق الثانية.

 
والله لو انجزت هالمدارس لتاخذ من الدعوات الشيء الكثير ويعتبر انجاز والله يعينكم جميع يا هالوزراء بعدين خلونا من التعليم كلها اسبوعين والمدارس تسكر.

 
الا ما تلاحظوا انه صارت موضة بعض المسؤولين يتفاخرون بردات الفعل اذا اشتهرت سالفة بالتويتر وطارت للترند جاك الذيب المسؤول يهرول يتوعد ويوعد ويقولك افا والله لافعل وافعل المصيبة ويتفاخرون بهالشي يا اخوي وينك من اول ما تتابع شغلك هو من الاساس لو انت تراقب عملك وموظفينك ماكان صارت هالمشكلة اللي اشتهرت.

 
نزاهة وحقوق الإنسان اكثر الي يستأسدوا بردات الفعل ولا الفعل ماش ما عندك أحد.

بذكركم بالربيعة يوم مسك وزارة التجارة والله ياهو ادب التجار المتلاعبين وللحين ندعي له كل ما بغى أحد يغشنا وهددناه، خلا لوزارة التجارة اسم مزلزل وعلمنا شيء كنا نسمع به برا هو حقوق المستهلك واعرف حقك وغيره وغيره كثير من ناس إشتغلوا صح وضبطوا شغلهم عدل.

 
الثمرة لا تتفاخروا بردات الفعل ولا تعتبروها إنجاز
الإنجاز والله إذا جبتلي فعل مثل صقور نايف وزعيمهم الامير محمد بن نايف يوم نتفوا الارهابيين تنتيف حيهم وحي فعلهم.

 
الانجاز والله يوم بليل اظلم اخذ الامير محمد بن سلمان تعليماته من الملك سلمان طول الله عمره وقلب ليل الحوثي نهار ما يدرون الا والنيران تقذف بهم من كل صوب ومكان ارثع بالظالم ارثاع.

صداها لفت الارض وسمعنا ان الاذناب بكل مكان ما جاهم نوم بعد هاك الليلة عليهم من ربي ما يستحقون
هذي انجازات.

اما يجيني مسؤل ويتفاخر انه حل المشكلة الي شافها القاصي والداني بالتواصل الاجتماعي هذا مو بفخر والله لا يشكر لك فضل.

 
عموما طولت السواليف نكمل بعدين،،،،
عاد يا شباب سنابي وتويتري فوق الله يحييكم جميعا