البشارة البشارة ابشركم بتجيكم البيوت من امريكا يمكن والعلم عند ربي بتجي بالبراشوت توه من اسبوع وزير الاسكان كان بامريكا يقولك راح لمهم وجلس يدور معهم على ازين طريقة لحل هالمشكلة عاد انا اقترحت عليه ببلاش جب البيوت واجدعها بالبراشوت وما عندك الا صحاري واراضي بيضا على مد النظر وابعد من النظر عاد بالله من جدك يا وزير !!

 
عاد تدري وهذا لك شخصيا طال عمرك انت شلون قدرت تكون شركتك وتنجحها وما شاء الله وصلت للسحاب اعتبر هالوزارة مثل شركتك بالضبط واشتغل .

 
وراك مكبر المواضيع والامور مدحدرة بهالوزارة وانت رجال ممتاز ونعم فيك لكن شغلك لك عليه يا رجال والله لو تطيعني وتعتبر هالوزارة شركة عزالله لتصير ازين وزارة وما تدري الا وكل الناس عندها بيوت ومستانسة .

 
لانكم مصختوها وزودتها كل يوم تعلنوا عن حل وما تنفذه لكن تروح لامريكا تستشيرهم ثم تعرض عليهم استثمار ومدري وشو يا اخوي الله يعافيك الدعوا سهله شوية بلك وكم عامل تغمض تفتح طلعت بيوت وفلل وشقق وزعوها .

 
ولا تنسى انا جايك مع درب المواطن العادي الي ما يتكلم بالارقام والاحصائيات ولا هذاك الطريق مطباته واجد تكفى تكفى انجز وخاف الله بالمواطنين وتذكر ان ما يدخل التاريخ الا واحد ربي يحبه وبيدعو له الناس ولا واحد ربي يكره ويدعي عليه الناس .

 
نقطة على الطاير
يقولون ترامب بيبتدي زيارته الرسمية خارجيا للسعودية وشفنا كثيرين طايرين ومستانسين ومرفعين بان ترامب بيجي هنا وقف يا حبيبي انت وياه انتم من جدكم متهولين هنا القوة هنا الحلول هنا الحزم والعزم وقفو ترا هنا سلمان ، و ترامب جاي هنا لانه يدري ومتاكد انه هنا العلم الي يجمد على الشارب والسلام ختام .

 
عاد انا عزمتكم عندي بالتواصل الاجتماعي بس ماش ما جا الا شوي انا اقول الله يحيكم كلكم وشوفو العناوين فوق عند الصورة .